Romans 8
Uleenu Tavunasi Uxolu Noxinge La Ulosinge Mauli
1La sou nenge ane texolu noxou Kalisito Iesu, la nenge tamomomo sou tatulu no anu vaivaikala sou lapuloto uasi. 2Xo nenge nenge'a Iesu texolu tepita, la lapuloto no anu Uleenu Tavuna mulosinge mauli, mo mulivulinenge no anu lapuloto sou susu xe soli. 3Lapuloto umomomo sou usu'ulinenge uasi, xo opo teinu noxinge mu'oxonenge la xavinenge sou tamulinu lapuloto ne uasi. Ia mii e lapuloto umomomo sou u'oxonu uasi ne Lataua molusi mu'oxonusinge ta mitema sou susu. Anu mune'e sou muxexeenu susu noxinge, xe no anu vasimolu la mutaloxolixu susu xaviinu. 4 aAnu mu'oxonu aloxo ne sou 'ilixo laixe sou lapuloto uxali no anu maulinenge, xo vaimomo 'o nenge tamuamua'i no anu opo teinu la uasi, nenge tamuamua'i no anu 'ilixo noxou Uleenu Tavuna.5Ane'i ane imuamua'i no anu 'ilixo sou opo teinu, la masaxa noxi'a ne uxolu no anu 'ili'ilixo sou opo teinusi sou imulimulinu. Ia ane'i ane imuamua'i no anu 'ilixo noxou Uleenu Tavuna, la xavutala noxi'a ne sou imulinu masaxa noxou Uleenu Tavunasi. 6Lexe itema uxavutala sou umulinu masaxa sou opo teinu la anu usoli, ia itema e xavutalau umulinu masaxa noxou Uleenu Tavuna, la anu uno'u mauli mo opoonu uxolu se'isisi. 7Itema e xavutalau utulu sou umulinu masaxa sou opo teinu, mo utaloxolixu sou umulinu lapuloto noxou Lataua uasi, la anu muxali uluau Lataua. 8Lataua u'osasi'a ane'i ane imulinu masaxa sou opo teinu ne uasi.
9 bIa ngingi ne ngamuamua'i no anu masaxa sou opo teinu la uasi, ia no anu Uleenu Tavuna. Ia lexe Lataua Uleenu uxolu noxinge manina, la ngingi ngamuamua'i no anu 'ilixo noxou Uleenu Tavuna. Mo lexe itema ane Kalisito Uleenu uxolu noxou uasi, la anu noxou Kalisito uasi. 10 cIa lexe Kalisito uxolu noxinge, la uleengengi umauli xo ngingi ngexali ta mitema ngelapu no iou Lataua, ia vasimenge ne usoli, xo no anu sususi. 11Mo lexe Uleenu Lataua e mutulusou Iesu no anu soli uxolu noxinge, la Anu ane mutulusou Kalisito no anu soli ne Uleenu uxolu noxinge kalumo. Mo no anu xaixai no anu Uleenu la Lataua ulosou vasimenge e musoli ne mauli kalumo.
12Aloxo ne, la sou ta vivilo, nenge xaixai noxinge sou tamulinu masaxa sou opo teinu mo taxolu ta'oxo'oxonu 'ili'ilixo sou uasi. 13 dLexe ngingi ngamulimulinu 'ili'ilixo sou opo teinu la ngingi ngasoli. Ia lexe no anu xavi Uleenu Tavuna, la ngingi ngamomomo sou ngavau 'ili'ilixo masumaua e uxoxolu no anu vasimenge ne, la sou ngingi ngamauli.
14Ane'i ane Lataua Uleenu uulaxune'i no anu muamua'ixa'a la ane'i ixali Lataua ta 'olu. 15 e , fXo Uleenu ane Lataua mulosinge ne, anu sou u'oxongengi ngaxali ta mitema sou xaixai vitanisi la mo nga'ume la uasi. Ia Anu mu'oxongengi la ngexali Lataua ta 'olu. Mo no anu xavi Uleenu Tavuna, la nenge ta'ava ulai noxou lexe, “Aba ▼ mamilo.” 16 hUleenu Tavuna nesi usu'ulinu uleenenge, la nenge tavikala ulaa uatu no ananenge lexe nenge Lataua ta 'olu. 17Vaimomo 'o lexe nenge Lataua ta 'olu, la nenge tamomomo sou tano'u mimii lailaixe ne. Mimii lailaixe ne Kalisito muno'u tei, la nenge kalumo tano'u aloxo Anu ne ili'i. Lexe nenge tano'u tu'utu'umaxu aloxo Anu muno'u ne la sou nenge kalumo tano'u uala tila loxo Anu muno'u ne.
Nenge Tano'u Mauli Laixe Ili'i
18Eni no anu xavutala noxilo la emaisou aloxo 'o, uala tila mo xoluxolu laixe e tano'u ili'i ne, uxali lamana la ua'ulixu tu'utu'umaxu e nenge taxolu no anu vaimomo 'o. 19Xo ta mimii latala e Lataua mukoine'i ne ixomaiou voxo e Lataua musosovosou sou upala'alixa'a ta 'olu ixali lamana ne uxali, la ixolu ne imolomolou tane'i xe iutitiiou voxo ne lexe uxali. 20 iXo ta mimii latala e no lia 'o ne mixolu aloxo nesi sou ikalu vitanisi. Ane'i ixali no anu masaxa noxi'a uasi, Lataua mu'oxone'i sou ixolu aloxo ne, ia ane'i ixolu la imolomolou tane'isi. 21Mo xavutalai'a utulu no anu voxo e Lataua musosovosou sou ululusi'a no anu sakisaki sou ikalu vitanisi mo i'ui ne, ilo'a Lataua ta 'olu ixolu laixe, mo mii vile usakisakine'i la uasi. 22Nenge telavusou lexe mimii latala e Lataua mukoinu ne, muxamulinu navunavu tatila loxo navunavu e sema ixamulinu sou ivo'o keakea. La ane'i latala ne a ixoxolu itatama xe iungaunga mo mune'e muxali vaimomo 'o. 23 jLa ta mimii nesi itatama xe iungaunga uasi, nenge ane Lataua mulosinge Uleenu Tavuna loxo mii lailaixe tei ne, nenge kalumo. Nenge kalumo taxamulinu navunavu mo tatama no nano no tanengesi, la taxolu se'isisi xe taxolu tautitiiou voxo sou Lataua upala'alinenge lexe nenge texali anu ta 'olu ne uxali lamana noxinge, mo vasimenge ukalusi uxiu uxali iouvilemo. 24No anu loopala noxinge nesi, la Lataua upamaulinenge. Ia lexe nenge temaisou mii ma'ia e nenge teloloopalanu ne muxali la anu ane ne loopala maninasou uasi. 'Ena'ei uxolu umolomolou tanu no anu mii ma'ia ane mumaisou muxali? 25Ia lexe nenge taxolu ta molomolou tanenge no anu mii e uxali uao, la nenge taxolu taxomaiou se'isisi.26Mo no anu vote'i iouvilesisi aloxo ne, no mine nenge xavinenge uasi la Uleenu Tavuna une'e sou usu'ulinenge. Nenge talavusou mii ma'ia sou takilakasou uasi la Anu usu'ulinenge sou ukilakasou. Anu ukilaka la uvilivolovolonu anaxu la umomomo sou nenge talavusou mii ma'ia e Anu ulelemolu ne uasi. 27 kXo Anu mulavusou tanenge no nano mukalusi ne, Anusisi mulavusou xavutalau Uleenu Tavuna, xo Uleenu Tavuna mumulinu xavutala noxou Lataua la sou ukilakasi'a ta mitema noxou.
Mii Vile Umomomo sou Uxexenenge no Anu Tanutanuxu Noxou Lataua Uasisi Manina
28 lMo nenge telavusou lexe Lataua mu'oxonu mimii latala muxaxai mupita ne sou u'oxone'i ane'i ane imasaxau ixali laixe. Ane'i ta mitema e Anu mu'avali'a sou imomomosou mii ma'ia ukalusie anu Lataua muxavutala sou u'oxonu ne uxali manina. 29 mXo ane'i ane Lataua musosovosi'a tei mo mukalipalane'i ne sou ixali loxo anu ta 'olu. La ta 'olu tavu'alo ixolu la vimo'a laposalaxu ane 'Olu ne. 30Mo ane'i ane Anu musosovosi'a, tei ne Anu mu'avali'a kalumo. Mo ane'i ane Anu mu'avali'a, la mumoxo'a lexe ane'i ta mitema milapu. Xe ane'i ane mumoxo'a lexe ane'i ta mitema milapu, la Anu u'iti ualasi'a mo ulosi'a mauli laixe noxou kalumo loxo Anu musakiinu vaikalasou tei.31 nIoxe la sou nenge tavikala a loxovaa no anu mii e Lataua mu'oxonu ne? Lexe Lataua uvulu noxinge, la sou 'ena'ei umomomo sou u'oxonu masuanenge. 32Anu u'apisou 'Olu uasi, ia mupalusou mune'esi sou musu'ulinenge latala mukalusi. Lexe Anu u'apixu 'Olu uasi ia mulosingesi, la sou Anu umomomo sou u'apisou mii tavu'alo e lexe ulosinge vitanisi kalumo ne a loxovaa? 33 oLataua musosovosinge lexe nenge ta na'u muisalili, la sou 'ena'ei umomomo sou utulusinge no anu vaivaikala? Uasi. Lataua anusisi ulavusou umoxo'inge lexe nenge ta mitema telapu. 34'Ena'ei uvikala lexe nenge tamomosou tano'u lakolisou susu noxinge? Uasi. Kalisito Iesu anusisi ane musoli xe mutulu kalumo ne, mo Anu a mulai muxolu muvaisa'inu Lataua no avolu tema e xaviinu musuku, mo uvivikalanu Lataua sou usu'usu'ulinenge kalumo. 35'Ena'ei umomomo sou uxexenenge no anu tanutanuxu noxou Kalisito 'o? Mo lexe tu'umaxu uxali noxinge, mo lexe tano'u navunavu, mo ta mitema i'oxonu masuanenge, mo tasolinenge mo menge tokolomo uasi, mo mii vile masua uxali sou u'oxonu masuanenge xe 'oto'oto uxali noxinge, la loxovaa, mimii ne umomomo sou uxexenenge no anu tanutanuxu noxou Kalisito? Uasisi manina.
36 pManina, mimii ne uxali aloxo kaukavu muai no nano no anu Lavuku Tavuna teinu, muvikala aloxo,
“Nexi texolu loxo ta mitema noxine,
aloxo ne la sou ane'i ivexevexe tasoisoli.
Ane'i imaisixe ne loxo nexi ta sipsip sou ive'a isoli.”
37Ia aloxo ne uasi, no anu tanutanuxu noxou Kalisito, la mimii ne uxali noxinge a loxovaa ne, ia utotomu ne umomomo sou utaloxolinenge uasi, nenge tauliuli manina. 38Xo eni emuxaxu taleli manina lexe mii vile loxo soli mo mauli, mo ta angelo mo ta uleenu ta masumasua e xavine'i musuku, mo mimii e muxolu vaimomo 'o mo mimii ane uxali ili'i, mo mimii iouiou e xaviinu musuku, 39mo mimii sou teitexi mo mii no lialia 'o, xe mimii mose'i la muxolu no pa'umenge 'o ne, umomomo sou uxexenenge no anu tanutanuxu noxou Lataua uasisi manina. Tanutanuxu noxousinge ne no anu xaixai noxou Tila noxinge Kalisito Iesusi.
Copyright information for
ATA